چیلله گئجه سی

چیلله گئجه سی گلدی یئنه قار یادا دوشدو
یای فصلی ده کی قیرمیزی قارپیز یادا دوشدو
ائللر یئغیشار بیریئره تا چیلله گیررکن
ائولرده کی ان یئریئمه لی لر یادا دوشدو
کورسو باشی دی قیرمیزی قارپیز بزه نیبدی
جؤز حالواسی کیشمیشلی نوخود دا یادا دوشدو
قارپیز کسیلیب حالوا گلیب نار دنه لندی
دارچین چایی دا قیش گئجه سینده یادا دوشدو
شانلی گئجه دیر بوزلو سویوق قارلی هاوادیر
تندیرده بیشن دادلی پازی دا یادا دوشدو
سوفره بزه نیب قیز گلین اوغلان کناریندا
رحمتلی سئویملی آتامیزدا یادا دوشدو
سؤز مولکو عزیز شهریارین شعری نواسی
حیدربابانین نغمه سی شعری یادا دوشدو
یای گئتدی پاییز گلدی آداخلی دویون ائتدی
تازه گلینین چیلله پایی دا یادا دوشدو
شیرین گئجه دی خاطیره لی یاخشی زاماندی
دونیا ده ییشن اقریبالاردا یادا دوشدو
ماهنی اوخونور دینله ییریک شن هاوالاری
بایرام گونونون شاد هاواسی دا یادا دوشدو
یلداگئجه سی ماهنادی ائل – طایفا بیر اولسون
ائل لر - اوبالار باشقا اولوس لار یادا دوشدو
چیلله گئجه سی شئعرین اوخور دویغولو شاعیر
دیوان بایاتی نغمه لی سس لر یادا دوشدو